Зимна роса

18.08.2014 17:57

Михаил Врабель, што в концѣ девятнадцятого вѣка был панучителем сперву в селѣ Чемерном Земплинской жупы, пак у Руском Керестурѣ, што в Сербии, а  дале робил новинарем у Будапештѣ и зобрал тото русинское народное спѣваное золото у невеличку книжочку, котрой дал славное имня «Русскій соловей», и – на свои грошы! – выпечатал ю 1890-го года в Ужгородѣ…

Мож цитовати и цитовати сесѣ русинскы народны  шедевры,  и такой серд­цем, душов чуствуеме не лем лексичный строй сих спѣванок, ай и то, яков незгаснов половенев сапат из них наш русинскый дух!

Иван Петровций

Зимна роса, – уж морозно,
в осени пристигат грозно.

Як пристигат, – вино цѣдят,
од дѣвчины ручку просят.

Я скосил яру пшеничку,
люде косят комоничку,

Я любил красну дѣвочку,
вна другому дала ручку.

Пойдь до ярма, малый бычку,
поореме милой лучку,

буду квѣткы засѣвати,
ачей, прийде поганяти.

Я купил чорну овечку,
што мнѣ принесла ягничку,

уж мам овцю и барана,
ачей пойде мила за мня.

Жерело: Русскій соловей. Народныя пѣсни. Собралъ М. Врабель Унгваръ. 1890. 34.