Синевирский, Николай. СМЕРШ. Год в стане врага

12.10.2015 19:51

НИКОЛАЙ СИНЕВИРСКИЙ «СМЕРШ. Год в стане врага» Франкфурт-на-Майне: «Грани», 1948, 139 с.

Файл PDF, 5.2 Мбайт.

 

Об авторѣ. Николай Синевирский – псевдоним Михаила Дм. Мон­ди­ча (1923–1968), Русина из Нанкова на Подкарпатской Руси, кот­ра межи двома войнами належала до Чехословакии. Тринад­цять­роч­ным хлопцем (!) пошов учити ся до Прагы: в меживойню в пражскых гим­на­зиях и универ­зитетах учили ся многы способны сту­денты из Под­карпат­ской Руси, в Празѣ им помогало добро­дѣй­ное карпато-рус­ское общество «Возрож­дение». Там став ся чле­ном Народно-Тру­до­вого Союза (НТС), рус­ской емигрантской орга­ни­зации, яка в тот час борола ся против комму­нистич­ного СССР, а днесь про­дов­жуе борьбу уже про­тив режима Путина. Од них до­став задачу за­кот­­вити ся до репрессивных органов неприятеля, кот­ру ему удало ся зреа­лизо­вати в року 1944, коли го взяли «до­бро­вольцом» до со­­вѣт­ского войська, а одты пак на службу до без­пе­кы яко зна­ю­чо­го веце чу­жых языков. При той службѣ быв свѣд­ком арешту Ав­гус­тина Во­ло­шина в Празѣ и много чого другого, але не мог вы­дер­­жати там ани еден рок. Коли удало ся му утечи до Нѣмещины, без­пека гледала го, але знаючи ей ме­то­ды зо се­ре­дины, быв на то гото­вый наперед и жив уже под новым име­нем, з фалшо­ва­ны­ми документами, з помочов НТС.   

 

О книзѣ. Спомины Мондича вышли в емигрантском ли­те­ра­турном алманаху «Грани» (специалный выпуск) в осе­ни 1948. Мон­дич, як сам пише, хотѣв ся стати писа­телем и русскый язык выбрав усвѣдомено. Розумѣе ся, не было то без вплыву русскых емигрантов, од котрых моло­дый хлопець быв и материално зависимый в чужых сторонах. В книзѣ автор пише, же безпекашѣ, коли го звербовали, видѣли, же не лем знае добрѣ русскый язык, але стямили у него смо­ленскый диалект. Се мало быти чудным у Русина, але ту на розлущеня того загадочного факта даякое свѣтло мечут чешскы архивы, котры пишут, же в септембрѣ 1942 быв он заарештованый Гестапом в Смоленску, коли неле­гално пробовав перейти на русску оккуповану территорию. Нѣмцѣ го депортовали назад до Пра­гы, де рок одсидѣв в темници Панкрац. В року 1944 вернув ся дому до Нанкова и одты зачинают ся подѣи, кот­ры списав во своей книзѣ. Велика часть их – то фактичный материал, але даякы особовы факты, имена, мусѣв перемѣнити, жебы не быти легко най­де­ным безпеков: так представлят ся як инженер, дипломовавшый у Буда­пеш­тѣ. А вшак од литературного твора не му­симе чекати абсолутной фактографичности, лем описаня атмосферы то­го повоенного часу, за котрый днесь мало что знаеме.

 

Читати або стерьхати:

http://www.mediafire.com/view/eemmdsxaqecpe1n/sinevirskij_smersh.pdf

https://yadi.sk/i/tw6_8Zm2jgkDZ