Пенкало

06.08.2013 19:14

Пера писати у давнѣйшых часах были такы, што ся мачали до тинты. Вынаходник Едуард Славолюб Пенкала (*1871, †1922), родом з Липтовского Микулаша, автор  до 80 запатентованых вынаходок, придумал и року 1906 запатентовал на Корольском патентном уряду у Будапешту под назвов «пенкала» механичну церузу, а 1907, слѣдом за тым, – наливное перо, до котрого ся тинта натяговала, и не требало го мачати. Тоты церузы и пера выробляла фабрика Penkala-Mostero, од чого ся повела и назва выробку. Слово «пенкало» сохранило ся доднесь у Русинов Бачкы-Срима и Пряшовщины, але заслужит и на повсемѣстное росширеня в память о своем вынаходнику.

Пенкала был сын польского Жыда (Pękała) и Данкы (Hannel), школу выходил у Микулашу, гимназию у Бельцах, высшу школу у Вѣдню (медицина) и Дре­з­дѣ (хемия). З его иншых патентов: двохмѣстовый аеро­план, термос, детергент (средство на райбаня), желѣзнична бремза, анодна батерия, лѣк на ревму, што ся выробляв под значков Radium Vinovica. Понеже Пенкала од року 1904 достал пост Корольского техничного инспек­то­ра министерии финансов Австро-Мадярщины у Загребу, приял там собѣ горватское имя Славолюб и Горваты днесь честуют го як свого. У Загребу доднесь фунгуе фабрика на выробу церуз, пенкал, фломайстеров, маркеров, фарб, тинт и тушов TOZ Penkala, Tvornica olovaka Zagreb.

Гротеска: Croatia Guide Book