Остра юха

12.04.2015 16:22

В нагодѣ свого 60-роча и появеня новой книжкы поезий «Аспи­рин» рафинованый маестро поезии Штефан Сухый, даючи интер­вю Народным Но­вин­­кам, мав неосторожность скритизовати Оси­фа Кудзея и Штефана Смолея, пишучых много и простым народ­ным языком. Тото была поетична одповѣдь Кудзея. Творчы спо­ры майстров красного слова были в нашой литературѣ и переже, нп. http://www.ruwega.com/news/vasil-rodu-izm%d1%a3nil%2c-russkij-bukvar-oskvernil/. Они свѣдчат о том, же литература жие, розвиват ся, глядаючи новы властны формы и способы реализации народного духа. И на то треба позирати, як на добрый знак.

Осиф Кудзей приимат гратулации

 

Высловив ся майстер кухарь,

Якбы член пороты,

Же недобра чужа юха,

Лем его – доброта.

И наварив юхы своей

В честь его имена,

Но ктось з гости повѣв: «Ой-ой,

Е моцно попрена!»

Бо майстер там попрю, соли,

Придав веце грудок,

А тот гость нарѣкав, коли

Попсув си жалудок.

Закыпѣла му жовч в тѣлѣ,

Тлак выскочив горѣ,

Думкы ся му розлетѣли –

Не е в своей скорѣ.

На пирулку „аспирину"

Дарьмо мав надѣю –

Занедовго знав причину:

Достав алергию.

Прицукрити нѣт охоты

В майстра острой юхы –

Гость втерат чоло од поту,

Но майстер е «сухый».

А так му одкрыто гварю

Из моста допроста:

«Теперь маш, майстре кухаре,

на сумлѣню гостя.

Прилѣп си на горнець пляйстром

Напис на папѣрю:

Не забывай, хоть есь майстром,

Мусиш мати мѣру!»

Жерело: Народны Новинкы 2006 №44–46;
Поздравлїня Русинів на 2006 рік, №4