Найцѣннѣйшый дар

29.11.2013 19:52

Осиф Кудзей не лем байкарь. Байкы, то лем една сторона его творчости, но первыма его умѣлецкыма пробами были робо­ты над церковныма текстами. Въедно з отцем Франтишком Крайняком робили над старославянскыма церковныма текстами, а сам написав коло 50 текстов церковных спѣванок. Его постой ку жывоту и крѣпка вѣра ся одбиват и в его творах.

Хотѣв раз Господь пресвятый
Трех ангелов выпробовати –
Мали принести через ноч
Зо землѣ найцѣннѣйшу рѣч.

Поросходили ся ангелы...
Два уж ся вертают веселы,
Скоро рано понад хмары
Несут Богу свои дары.

Першый обчекуе одмѣну,
Его дар мат велику цѣну –
Он принес Господу новы
Пацеркы златы ружанцевы.

Як дар указав ангел другый,
Аж зблѣдли фарбы радугы –
Он принес ку Божому трону
Красно намалевану икону.

Господь повѣв: «Дары немалы,
Суть справды достойны хвалы,
Тѣшу ся з них, то правда свята,
Но чекам и вашого брата.»

Уж третий ангел свой дар несе,
Радость наповнюе небеса –
В его руках блищит велика
Слыза каючого ся грѣшника.

А Господь дав одмѣну ему,
Тому ангелови третему,
Бо он хоть пришов найпозднѣйше,
Принес тото найцѣннѣйше.

Кедь щиро жалуеме грѣхы,
Мы маме хосен, Бог потѣху,
Бо слызы доконалого жалю
Ангелы Господу зберают.

Жерело: Народны Новинкы 2006 №44–46;
Поздравлїня Русинів на 2006 рік, №4

Мальба: Катя Медведева, 2006