Храньме мир на земли

20.05.2015 11:16

Войнова тематика в творчости Штефана Смолея е доминантов, и хоть он опе­рат ся все на реалны факты и особ, переростат она рамкы хроникы и в его выкладѣ по­ста­ват умѣлецкым вытвором высокого сосполного звучаня. «Ще до днеська людям не змог никто высвѣтлити, чом мусѣли толькы жертвы люде приносити» – то не е про­сто реторичное звѣданя, над котрым ся задумуе. То е и мементо про днешны новы ге­не­рации, котры, на жаль, як видиме, нич ся не научили з истории и сут легко под­дай­ным объектом в руках политичных манипулантов.

  

На память Андрѣя Шанты из Рошковець,
котрый загынул в новембрѣ 1944 р. в селѣ Миновцѣ
в Стропковском окрузѣ, де есть и похованый.

 

Од послѣдной страшной войны

вельо роков прошло,

много людей ся минуло,

вельо на свѣт пришло.

Фронт перешол нашы села.

Люде ся вертали

до своих сел из далека,

домов приходжали.

Андрѣй Шанта из Рошковець

домов ся понаглял,

як и другы, своих близкых,

жену, сына глядал.

У Миновцях ишол полем,

мина выстрѣлила,

одорвала едну ногу,

другу поранила.

Андрѣй лежал, не годен был

з землѣ ся подняти,

кричал, плакал, стал ку собѣ

помоч призывати.

Недалеко в селѣ люде

его плач слухали,

живот ему захранити

одвагы не мали.

Кто бы пошол до пропасти

исту смерть глядати?

Андрѣй мусѣл без помочи

На полю сконати.

 

Стихли слова, нарѣканя,

сонце западало,

из послѣдныма лучами

з ним ся розлучало.

Вѣтор задул, як бы хотѣл

раны загоити,

з Андрѣевой зимной твари

слызы высушыти.

Вмѣсто мамы земля-мати

зтиха зашептала:

«Спи солодко, милый сыну» –

и его обняла.

Вельо страсти, болю, жалю

люде проживали,

а про кого слызы и кровь

свою проливали?

Ще до днеська людям не змог

никто высвѣтлити,

чом мусѣли толькы жертвы

люде приносити.

Храньме мир на нашой земли,

в мирѣ добрѣ жити,

лем треба еден другого

любити, учтити.

 

 

Жерело: InfoРУСИН 5/2006. 6.