Исуско

15.06.2016 13:17

Иллустрация: Вероника Калачева

 

Объяв тихый сон дѣточкы,
Румяны им личка;
Высвѣчена сние ся им
Зелена еличка.

Як уснули, сей сон видять:
Свѣтло стало небо,
Три ангелы в свѣтлой зари
Летѣли чрез него.

Премилено дѣтя несли,
Исуска малого,
Такой любви, кротости нѣт
На земли, як его.

 

А як Он попод небеса
Понад домы летить,
Позазирать, де лем едно
Мале дитя лежить.

Кедь послушне благе дитя
Найде, ся радуе,
Такых небесный Младенець
Од сердця милуе.

З радостию воспомяне
Нужду, убожество,
А всѣх щедро обдаруе
На святе Рождество!

 

 

 

МѢСЯЦОСЛОВЪ СЪ ТѴПИКОМЪ на годъ 1921.,
 имѣющій 365 дней. Въ Пряшевѣ,
книгопечатня Св. Николая, 1920. Ст. 47.