Божечку муй милостивый

19.08.2014 09:36

Зборник Михаила Врабеля «Угро-Русски Народны Спѣванки», выданый в Буда­пештѣ року 1900 мае субтитулок «Томъ I. Спѣванки Марамарошски», з чого можеме ся здогадовати, же хотѣл зоставитель продолжити свою величезну роботу и по другых, не менше богатых русинскых краях. Жаль, же му то даяк не вышло. У сем зборнику зоставитель лишил даякы елементы у фонетичном запису, одповѣдно мараморош­скому выгваряню, и такы можеме видѣти и на сем примѣрѣ. Спѣванкы того зборника сут понумерованы, а первое, што по­разит читателя: е их 869+9=878 (+9 ото два раз захыбом еднако пону­ме­ро­ваны спѣванкы од числа 545 до 553). Сесю, сто пяту, илуструеме фрагментом з образа украин­ского маляря Миколы Пимоненка.

 

 

Божечку муй милостивый,
що знаю чинити?
не е у ня сѣна стебла,
нѣгде докупити!

Ци так, сыне молоденькый,
теперь догадав ся,
лѣто было великое,
у холод есь туляв ся.

Бери, жунко, граблѣ в рукы,
а я беру косу,
ачей, даст Буг довге лѣто,
вуз сѣна накошу.

Ци ты его, жунко, сушиш,
ци-сь го обертала?
Помалы из грабельками,
обы-сь ся не зорвала.

А богдай ты, чоловѣчку,
здоровко вѣковав,
кой ты мене у роботѣ
ай так пошкодовав.

 

Жерело: Угро-Русски Народны Спѣванки. Издалъ Михаилъ Врабель
Томъ I. Спѣванки Марамарошски. Будапештъ 1900. № 105.