1851 Я Русин был, есмь и буду

15.03.2013 20:54

ВРУЧАНІЕ

 
Я Русин был, есмь и буду,
Я родился Русином,
Честный мой род не забуду,
Останусь его сыном.
Русин был мой отець, мати,
Русская вся родина,
Русины сестры и браты
И широка дружина;
Великій мой род и главный,
Міру есть современный,
Духом и силою славный,
Всѣм народам пріемный.
Я свѣт узрѣл под Бескидом,
Первый воздух русскій ссал
И кормился русскім хлѣбом,
Русин мене колысал.
Коль первый раз отворил рот,
Русское слово прорек,
На азбуцѣ первый мой пот
З молодого чела тек.
Русским потом я питан был,
Русским ишол расходом
В широкій свѣт, но не забыл
З своим знатися родом.
И теперь кто питает мя?
Кто кормит, кто мя держит?
Самое русское племя
Мою годность содержит!
Прото тобѣ, роде мой,
Клянуся живым Богом,
За печальный пот и труд твой
Повинуюся долгом.
И отдам ти, колько могу,
Прійми той щирый дарок,
Прійми вот маленьку книгу
И сей писменный рядок;
Прочее же не забуду,
Сердца моего скруху
Пожертвити; – я твой буду,
Твоим другом и умру.
                            А. Духнович



                                                            Жие оддавна доднесь

Духновича, про его силный вплыв на народну самосвѣдомость, в том часѣ модно выкликовану по цѣлой Европѣ, назвали Будителем Русинов. И можно сказати, что се Духнович досяг одным вершом «Вручаніе», котрый верш мы спѣваеме як народный гимн, коло территориалного гимна «Подкарпатскіе Русины», так само од Духновича.
А.Г., Одна лекція из исторіи литературы
Русинов. Руська Молодежь, №2, 1943–1944
«Вручаніе» – една з майпопуларнѣйшых и майзначнѣйшых поезий Духновича, в якой он выразив свое националное кредо в условиях гнету и преслѣдованя его народности. Точно становити датум еѣ взнику не е возмогы, зачим не дойшов до нас жаден датованый автограф поезии. Мож ганути, же она возникла десь на зачатку 50. роков минулого столѣтя, коли под вплывом револуцийных подѣй и стрѣчи з великоруськыма братами Духнович обернув ся ку патриотичной тематицѣ и яв розвивати активну културно-просвѣтительску чинность. Первый раз она была напечатана у Духновичом зложеном алманаху… «Поздравленіе Русинов на год 1851 от Литературнаго заведенія Пряшевскаго» (Вѣдень, 1851, стор. 69–70) як послѣслово за поетичным добором книжкы, в яком ушоритель вручат читателям свою «маленьку книгу» и при той нагодѣ высловлят свои майдорожы сердцю думкы о любви и повинностях до свого народа.
Олена Рудловчак, Зо зазначок ку 1. тому
«О. Духнович, Твори в 4-х томах»,
Братислава, 1968–1989
…мелодия, основу котрой творит майзнамѣйшый верш Александра Духновича… «Вручаніе», … была ку нёму зложена … (композитор зостав незнамым) и спѣвала ся з нагоды розных подѣй Русинов уж в часѣ другой половины 19. ст. Ш. Фенцик опубликовав мелодию на слова «Я русин былъ» у своём зборнику в 1921 роцѣ, а наслѣдно ю управлёвали: Илля Тёрох (1927), О. Кизима (1928), Михайло Гоер (1942) и Винко Жганець (1946, 1996). … В часѣ комунистичной еры гимну «Я русин былъ» было на Карпатской Руси заказано спѣвати… По паду комунистичной влады е презентована на русинскых акциях на Украинѣ и на Словакии, хоть не мат официалный статус.
Павел Роберт Маґочій, Русиньскы народны гімны.
http://www.rusynacademy.sk/rusynski/rusyn_muzika.ht